Karjalan piälinnu: kymmene uttu autobussua
Petroskoile tulluot ajonevvot tarkasti Karjalan piämies Artur Parfenčikov. Karjalan piälinnah ostettih kymmene keskilajin autobussua SIMAZ-mallii kanzallizen Infrastruktuuru elaigah nähte -projektan mugah. Artur Parfenčikov yhtes Petroskoin linnan piälikön Inna Kolihmatovan kel da tazavallan tranportuvirraston piämiehen Dmitrii Krilovan kel arvotsettih uuzii autobussoi. Net ruatah ekolougizesti puhtahal poltoainiel — komprimiirovannoil luonnonguazul.
— Piälinnah pidäy suurembua autobussua niilöil maršrutoil, kudamil on enin ajajua zatoraigah. Uljanovskas luajitut autobusat hyvin ozutettih omua iččie, net ollah mugažat, turvallizet da ekonoumizesti huogehet, sanoi Karjalan piämies omassah lehtistöpalvelule.
Linnan transportu -laitokses sanottih, ku autobussoi ruvetah käyttämäh linnan maršrutoil kudamil on enin ajajua, niilöin luvus ongi sotsiualutärgiedy: n:o 30, n:o 18 da n:o 16.
— Tänä vuon Karjalan haldivon kannatuksel myö ostimmo 18 autobussua, nygöi tuli vie kymmene. Työnimmö zajavkan vuvvekse 2026, ku suaja vie 11 autobussua iellizen linnan transportuinfrastruktuuran kehittämizekse, sanoi Inna Kolihmatova.
Uuzis autobusois on videotarkastuksen sistiemu, autoinformuatorat sähköviittehien kel, ERA-GLONASS-sputniekkunavigatsii, kuduan avul boibi kuččuo kiirehellizet abupalvelut. Ulgopinnoil da syväimes on piktogrammua da viehkua, kudamien vuon niistiet rahvas kebjieh löytäh tulendu- da lähtendyveriän.
Petroskois transportureforman allus algajen on luajittu seiččei uuttu maršruttua.
Aihies voit lugie suomeksegi.
Yhty Oman Median kanualah Telegramas!
