Karjalan pentujen tiijolliset matat -šarjakuvakirja jatkuu
Venäjän tietoakatemijan Karjalan tietokeškukšešša on ilmeštyn Karjalan pentujen tiijolliset matat. Uuvvet šeikkailut -lapšienšarjakuvakirja. Uuvvet šarjakuvat jatetah enšimmäistä kirjua, kumpani näki päivänvalon vuotena 2022, a vuotena 2025 še painettih uuvveštah, ilmottau Karjalan tietokeškukšen tietoviestintäpalvelu.
Kirjan luatijat, geologijan instituutin johtaja Sergei Svetov ta taiteilija Anna Danilova, jatettih mukavie matkoja geologisie reittijä myöten.
— Karjalan tietokeškukšen geologijan instituutin johtaja, geologis-mineralogisien tietojen tohtori Sergei Svetov kerto, jotta ideja kirjan luatimisešta tuli šen jälkeh, kun instituutin ruatajat julkaistih Karjalan geologini perintö -matkaopaš aikuhisie varoin, kerrotah tiijotukšešša.
— Matkaoppahašša staraiččima šelvällä kielellä kertuo aikuhisilla mielenkiintosista geologisista reittilöistä. Niin, meijän tarkotukšena on, jotta Karjalan uškomattoman mielenkiintosešta geologijašta šuatais tietyä niin ušiet ihmiset, kuin mahollista. Tajusin, jotta pitäy alkua ruatua lapšien kera. Heilä pitäy valita šelvä, lakonini ta mukava ilmaisumuoto, šaneli Sergei Svetov Karjalan tietokeškukšen tietoviestintäpalvelulla.
Uuvven kirjan henkilöjä vuotetah Kivačču-koški, Luatokka, Ruskeala-vuarapuisto ta Petroskoi.
Karjalan pentujen matkojen jatko on julkaistu Karjalan tašavallan granttišiätijön kannattaman Karjalan kiviaikakirja: geologisen ta mineralitevollisen perinnön popularisointi -projektin rajoissa.
Yhty Oman Median Telegram-kanalah!
