Arvokahan znaman Maria Šašinale andoi Painusen päiväl Karjalan valdkundan pämez’ Artur Parfenčikov žurnalistoiden konkursan vägestajiden pauklahjoičendal.
— Minei om mel’he, miše minun rad da meiden rahvahaližen toimišton rad homaitas. Kaikuččele žurnalistale om tärged teta, miše hänen rad om tarbhaine, miše se om tarbiž kenele-se. Meletan, miše sada mugoižen korktan pauklahjan minei abuti meiden ”Jätan ičein jäl’gen”-fil’m, sanub Maria.
Johtutam, miše ”Jätan ičein jäl’gen”-fil’m arvostadihe muloi ”SEZAM” -öbokan žurnalistoiden konkursal. Nügüd’ nece fil’m om lujas popul’arine, kacmata sihe, miše se om tehtud vepsän kelel. Fil’man päheng Sergei F’odorov starinoiči Maria Šašinale, miše nügüd’ hänennoks tuleskeleb rahvaz, hänes tetas kaikjal.
Maria Šašina radab GTRK ”Karelian” rahvahaližes toimištos vodelpäi 2008. Hän om äiluguižiden lehtezmehiden da teleradnikoiden konkursoiden vägestai.