Karjalan opastai virki kehoituksen prezidentale
Ven’an prezidentu Tiedoloin päiviä vaste vastavui opastajien kel Moskovan pedagougizes yliopistos, kudai on eräs vahnimii muan opastuslaitoksii.
Vastavukses toizien joukos oli Kostamuksen gimnuazien opastai Aleksei Bokkin, kudai voitti kilvas Karjalan vuvven opastai 2023. Sankt-Peterburgan yliopiston loppenuh Bokkin ruadoi Piiteris seiččei vuottu da vuvvennu 2021 piätti tulla omah linnah, Kostamukseh, kus nygöi ruadau fiiziekan da matemuatiekan opastajannu Zemskii učitel’-programman mugah.
— Meijän lohkol, pienis linnois myö tunnemmo valdivon kannatustu, ellendämmö, ku meil ollah samat olot, kui suurien linnois opastajil da opastujil. Myö olemmo kiitollizet teile avus, haldivon da opastundanministerstvan kehoituksis, kerdou Bokkinan sanoi Karjalan piämiehen lehtistöpalvelu.
Meigäläine opastai vihjai kluasoin johtajien valmistamizen tärgevytty da kiändyi prezidentan puoleh, ku kannatettas pedagougizien praktiekoin piendiä.
— Nelläs vuvves meijän muas piettih kymmene pedagougistu ekspeditsiedu, kudamii hommattih iče opastajat — Altai, Rostov-na-Donu, Novosibirsk da toizet. Moizien matkoin aigah opastajat kogo muaspäi ei vaigu tuttavuta toine toizeh da juatah ruadokogemustu, ga tutkitah luonduo, tuttavutah mieldykiinittäjih objektoih, kul’tuurah, sanoi Bokkin.
Aleksei Bokkin pidi varmuttu, ku opastajat ollah valmehet iellehgi yhtymäh moizih projektoih valdivon kannatuksel.
— Se on ylen tärgei suundu, ku opastajat syvendyttäs nygöi olijoih tapahtumih, histourieh, alovehien mahtoloih, sanoi Vladimir Putin.
Vastavuksen tuloksien mugah Ven’an piämies käski opastundanministerstvale suaja yhtevytty muan alovehih, ku livuttua sidä ruaduo.
Yhty Oman Median kanualah MAX:as!
