Karjalan nelli linnua čomendetah mural-piirustuksil
Karjalan nuorižo rubieu todevuttamah uuttu projektua: mural-piirustuksien festivuali rodieu Polosa otvoda-linnanfestivualin jatkokse.
— Muraloin festivualih vuvvennu 2025 yhtyy nelli linnua: Petroskoi, Kostamus, Anus da Karhumägi, sego kaksi kyliä – Mujehjärvi da Kalevala. Kymmene muralua, art-objektua da piirustustu suau nähtä linnoin pihoil jo tänä kezän, Karjalan tazavallan nuorižopoliitiekan haldivo kerdou tiedottehes.
Projektah kučutah pihoil piirustajua taidomiesty, arhitektoroin joukkuo Karjalan tazavallan kaikkielpäi. Festivualih yhtynyzih niškoi hommatah ruadopajat: taidomiehien piän al hyö yhtytäh muraloin luadimizeh Petroskois, Kostamukses, Anukses da Karhumäis.
Karjalan eläjil kyzytäh, mittumat muraloin aihiet oldas nygyaigazembat. Jogahizel on mahto sanuo oma mieli. Karjalan eläjien kehoituksii vuotetah tuhukuun 28. päiväh suate.
Projektua todevutetah kanzallizen projektan ”Nuorižo da lapset” Aloveh nuorih nähte -programman mugah. Festivualin luadijannu on Karjalan alovehelline Nuorižokeskus.
Mural on rakenduksih luajittavu piirustus. Enämbäl paginal olijois graffiti-piirustuksis niidy eroittau suurus. Muralat voijah olla suurien monikerroksizien taloloin seinien suuruot. Tämä taidoluadu yhtistäy perindöllizen fresko-taijon da nygyaigazen street art:an piirdehet.
