Agroaljans-laitos jatkau Elaijan marju -projektua. Vuvvennu 2024 laitos on suannuh “Agroturizman” federualuvarua 5 miljounua rubl’ua. Nämmih varoih “Agroaljans” tahtou azuo Anuksen piiris tilat, kudamis ruvetah pidämäh master-kluassoi. Niilöil ruvetah ozuttamah, kui luadie magiedu syödäviä marjois.
Mennyt vuon moizile harjaituksile on käynnyh enämbi 1 000 turistua. Anukses Karjalan marmeluadu-kauppupaviljounas turistoile ozutettih karamellin da zefiiran luajindua. Vuvven 2025 oraskuus algajen moizii master-kluassoi ruvetah pidämäh alalleh ymbäri vuvven. Paiči sidä turistoile ruvetah sanelemah Karjalah nähte, meijän mečis kazvajis marjois.
— Erilazien grantoin da abuvaroin vuoh muatalovuslaitoksil rodieu enämbi mahtuo suurendua ruadovoimii, levendiä tuotanduo, sanoi Karjalan mua- da kalatalovusministru Andrei Kvasnikov ministerstvan lehtistöpalvelule.
Tänäpäi “Agroaljans” käyttäy enämbän 100 tonnua marjua vuvves. Vagois, must’ois, šl’ubois, čihois da toizis marjois luajitah marmeluadua, varen’n’ua, sorbettua da zefiirua. Paiči sidä laitoksel luajitah havvottuu marjua, karamellii, marjudražee. Tuotanduo suurendetah joga vuottu. Uuzien tavaroin luvus on šokoluadu havvotun marjan kel da šl’uboipainin.
Jälgiaigua agroturizmu kehittyy ylen ruttoh. Turistumatkat fermeroilluo da master-kluasat, kudamil luajitah erilazii syömizii, annetah linnalazile mahton tuttavuo mual eläjien argielokseh, ihailla karjalastu luonduo da oppie paikallizien fermeroin tavaroi.