Karjalan liivat da kalat – syödäväkse
Karjalan piämiehen piän al kalastuksen kehittämisty šeikuittavas istundos oli annettu käsky sellittiä kyzymykset, kuduat koskietah lapsien kalasyömizien luajindua. Samas pivos Parfenčikov käski vähendiä kieldoloi, kuduat koskietah kalastandua, da säilyttiä perindöllizet kalaniekoin kovat.
Parfenčikov korosti Ven’an prezidentan kalan syöndän suurendamistu koskijoin käskylöin täyttämizen tärgevytty. Karjalan piämies käski laitoksile da valdivovallan elimile yhtes Lapsien syömizien instituutan kel šeikuija kalasyömizien luajindua lapsih niškoi. Se andau mahton luadie hyödyllisty da tervehyöle hyviä syömisty kazvajale polvele da samal parandua tazavallan eläjien tervehytty.
— Myö voimmo luadie lapsien syömizii pikšas, tr’oskas, torpas. Pidäy kehittiä syöndykul’tuurua lapsusaijas algajen, sanoi Karjalan piämies omassah lehtistöpalvelule.
Vie eräs tärgei istundos paginal olluh aihe oli kalastandan kiellot tazavallan eläjih nähte. Karjalan piämies käski kirjuttua siännöt, panna kirjoile da säilyttiä kalastajien kovat. Net ollah perindöllizen landšaftan jaguamatoi vuitti, kudai säilyttäy meijän alovehen kul’tuuristu perindyö.
Karjalan kalastustalovuon kehityksen tulii aigu on kiini Valgien meren liivuresursoin käyttämizes. Muzavien liivoin talovusvaroi lugietah kymmenin tuhanzin tonnin, ga niilöi putilleh ei käytetä.
Karjalas jo kehitetäh projektoi täl alal: vuvven 2025 lopus alletah luadie lapsien da sportumiehien syömizii, sego biolougizesti aktiivizii ližävölöi Valgien meren liivois.
Aihies voit lugie suomeksegi.
Yhty Oman Median kanualah Telegramas!
