Karjalan lehtimiehet šuatih arvonimet ta kunnivokirjat
Tänäpiänä Karjalan kanšojen yštävyškojin salissa Kajalan piämieš tervehti ta onnitteli Karjalan lehtimiehie Venäjän painon päivällä ta myönti arvonimijä ta kunnivokirjoja. Palkitettujen luvettelošša on tašavallan toimistojen ta lehistöpalvelujen toimittajie ta lehtimiehie, ošaštojen johtajie ta spesialistija.
‒ Nykypäivinä ihmiset tarvitah totta. Ihmiset tahotah lukie hyväštä tovešta, kun myö pakajamma šuavutukšista, niitä on äijän ta niise proplemoista, niitäki on. Kun mediaviessintä niin ruttoh kehittyy, on tärkie šäilyttyä paperilehtijäki, kumpasista monet šuahah nykytärkietä tietuo, šano Karjalan piämieš Artur Parfenčikov.
Kanšallisien toimitukšien toimittajat niise oli palkittu. Karjalan TV- ta ratijoyhtyvehen kanšalliskielisien toimitukšen johtajan šijahini Ol’ga Ogneva šai Karjalan Anšijoitunut lehtimieš -arvonimen.
‒ Kiitän teitä ta šanon, jotta meijän ruato antau meilä mahollisuon pityä henkissä meijän muamonkieltä – karjalua, šano seremonijašša Ol’ga Ogneva.
Hänen ammattitaival alko Periodika-kuštantamošša, Oma Mua -leheššä, kumpasešša nytki Ol’ga on työryhmäh kuulumatoin toimittaja.
Oma Mua -lehen piätoimittaja Marija Spitsina monivuotisešta ahkerašta ruavošta ta kanšalliskielisen journalismin šäilyttämiseštä šai Karjalan piämiehen kunnivokirjan.
‒ Ruan leheššä vuuvvešta 2005. Ammattih mie tulin miun muamon peräkkäh. Hänen anšijošta mie tiijän karjalan kieltä ta hänen anšijošta tulen lehteh ruatamah, šano Oma Mua -lehen piätoimittaja Maikki Spitsina.
Karjalan piämiehen kunnivokirjat šuatih niise Kodima-lehen piätoimittaja Irina Sotnikova, Oma Media -portalin vaštuullini sihteeri Margarita Pehkonen, Karjalan Šanomat -lehen toimittaja Anna Sidorova.
Aihiešta voit lukie niise venäjäkši ta vepšäkši.
