Karjalan kyläh istutettih harvinazet puut
Vahnu Matrossu -Alovehellizeh Yhteskunnallizeh Ičehalličukseh kuulujat rahvas kunnostettih oman AYI:n alovehen. Viza- da kivikoivun, harmuan spirein da Pedri Suuren kuulužan tammin istuttajazet jo čomendetah kylän eri paikkoi.
— Kuni oldih lämmät päivät, da poudusiä ihaškoitti meidy, Vahnu Matrossu — AYI:n aktivistat järejestettih kyläs talgohruavot kylän kunnostamizekse, kirjutetah Vahnu Matrossu -AYI:h kuulujat omal vk-sivul.
Harvinazien koivuloin taimenet andoi aktivistoile Ven’an Tiedoakadeemien Karjalan Tiedokeskuksen meččyinstituutan meččybiotehnolougieloin laboratourien piälimäine tiedoruadai Lidija Vetčinnikova.
Paiči koivuloi, kezäl kylän erähäh huogavundukohtah istutettih erinomazen tammin taimen. Oppikkua duumaija, se on Pedri Suuren vuvvennu 1708 Kezäsaduh istutetun kuulužan tammin idoine. Kuibo se puutui Karjalan kyläh? Pedri Suuren kogo Ven’an tammikko -programman mugah Ven’an muzein ruadajat kerätäh tsuarin istutetun tammin terholoi da kazvatetah niilöi kukkuastielois kolme vuottu, sit istutetah muah. Ielleh tammin taimenii juatah Ven’an linnoih da kylih.
