Karjalan Kielen Koin Abuniekat roittihes Suomen puolel
Kezäkuus Suomen puolel Ilomančin kunnas pandih algu Karjalan Kielen Koin Abuniekat ry -yhtevyksele. Yhtevykseh on mennyh 45 ristikanzua ymbäri Suomes. Pohju tälle on jo sentämän vuvven ammuine: Ilomančin kanzalaisopistol da Karjalan Kielen Koil on yhtesruaduo jälgimästy kolme vuottu. Piälimäzii ruadoloi on karjalan kielen opastundu loittuopäi.
Suomen puolel kerdyi jo suurehko joukko Koin toimindan tiedäjiä da kannattajua. Abuniekoin suandu on ani aijankohtaine Karjalan Kielen Koile. Täs ruatah kerho da ildupäivykerho školalapsih nähte. Kaikkiedah 17 lastu suajah karjalankielisty kazvatustu. Yhtevys ei voinnuh suaha tämän ruavon finansiiruičendua da piätti levendiä mieron verkostundua, partn’ouroin da tuven ečindiä.
– Abuniekoin yhtevys meinuau hommata kul’tuuru- da pruazniekkupidoloi, opastusmatkoi, kerähmölöi, kursoi da myös jullata opastusmaterjualua. Varoin suitandah niškoi suau pidiä subbotniekkoi, jarmankoi da jen’gukerävyksii, ottua vastah lahjoituksii da perindöbumuagoi – muga kirjutetah siändölöis. Tärgienny pietäh muga sanottuu sotsiuallistu mielihyviä mollembile puolile, seurustelendua, toine toizelluo gostih käyndiä da kogemuksien vaihtandua. Jogahine Suomes eläi vojii luadie lahjoituksen Karjalan Kielen Koin toimindan hyväkse Abuniekat-yhtevyksen kauti. Lahjoittai suau vallita midä tahtos kannattua: kielipeziä, Koin ustuavanmugastu toimindua libo Vieljärven kylän elaijan parendamistu, sanelou Karjalan Kielen Koin ruadai Natalja Antonova.
