Karjalan kielellä omissettih pitoja tašavallan eri paikoissa
Šulakuun 6.—12. päivinä Karjalan eri piirilöissä ta Tverin alovehella piettih monie erilaisie pitoja, kumpasie yhisti yksi teema — karjalan kieli ta kulttuuri.
Šatoja ihmisie tuttavuštu lähemmäkši karjalan kieleh. Tilaisukšien järještäjät näytettih, millä tavalla kieltä voipi kehittyä ta šäilyttyä. Karjalan tašavallan ta Tverin alovehella eri piirissä karjalan kielellä ta kulttuurilla omissettih näyttelyjä, konserttija, spektaklija, leikkijä, monie onlinekyšelyjä ta tietokilpailuja, yheššä lašettuna tuli monta kymmentä pituo.
— Tänä vuotena on äijän tapahtumie lapšie ta nuorisuo varoin. Niijen järještäjät aktiivisešti julkaissah tilaisukšien tietoja ta valokuvie internetissä. Karjalan kielen netäli virallisešti piätty eklein, ka myö niämmä, jotta rahvaš vielä vietetäh karjalan kielellä omissettuja pitoja ta myö, varmašti, kerromma niistä keškukšen šivulla, šano aktijon kurattori, Karjalaisien, vepšäläisien ta šuomelaisien resurssikeškukšen spesialisti Alina Kartinen.
Karjalan kielen netälin jälkeh alko vepšän kielen netäli. Molommat aktijot ollah omissettu Karjalan ta vepšän kirjakielien päivällä. Järještäjänä on Periodika-kuštantamo Karjalan tašavallan kanšallisen ta alovehellisen politiikan ministerijön kannatukšella.
