Karjalan Kelen, literaturan da istorijan institutale – 95 vot!
28. redukud 2025 Venäman tedoakademijan Karjalan tedokeskusen konferenc-zalas mäni praznikaline Tedomehiden nevondišton ištund. Se oli omištadud Kelen, literaturan da istorijan institutan 95-voččele jubilejale.
Ištundan programmaha mülüi äi melentartušt. Ezmäi istoriitedomez’ Jelena Dubrovskaja ezini kundlijoiden edes dokladanke enččes Institutan pämehes Maria Nikolajevna Vlasovas da hänen socialižes i professionaližes elos. Sen jäl’gle Venäman tedoakademijan ühtnik-korrespondent Irma Mullonen starinoiči uden “Studia Nordica” -elektronižen tedožurnalan polhe. Ištundan lopus adivoil oli voimuz kacta “Territorija Kul’turi” -programman ezmäižen vipuskan, mitte om omištadud Institutan 95-voččele jubilejale.
Ištundal kului äi čomid, lämid sanoid. Kelen, literaturan da istorijan institutan radnikoid ozateliba rahvahaližen da regionaližen politikan ministerstvan, Karjalan tedokeskusen, rahvahaližen kirjišton, Petroskoin universitetan, konservatorijan, rahvahaližen muzejan da Pohjoižen veziproblemoiden institutan ezitajad. Ozatelendsanoidenke tuliba mugažo adivod R’azanin universitetaspäi. Äivoččes satusekahas ühthižrados Institutad spasiboiči “Periodika”-painišton radnikad-ki.
— Läz voz’sadan aigan meiden institut om sanu surid satusid Karjalan rahvahiden keliden da kul’turiden, a mugažo kogonaižen regionan istorijan oppimižes. Institutan radnikoiden pämelentartusen om kaiken olnu süvid tedo-oppindoid. <...> Nügüd’ pidäm vastust siš, miše čomin zavodida tošt voz’sadad da jatkta sidä, mihe paniba augon meiden tetabad edeltajad, sanui Kelen, literaturan da istorijan institutan pämez’ Irina Petrovna Novak.
Venäman tedoakademijan Karjalan tedokeskusen Kelen, literaturan da istorijan institut om Karjalan kaikid vanhemb tedo-oppindorganizacii. Karjalas se om üksjaine gumanitarižen polen akademine institut.
