Karjalan kanšojen yštävyštalošša vejettih yhteh kielikurššien vuosilopputulokšie
Vuotena 2025 valtijotuvella Yštävyštalon Resurssikielikeškukšešša vietettih yli 300 karjalan kolmen murtehen ta vepšän kielen oppituntie. Kielie opaštuu yli 150 henkie. Heijän luvušša on alottajie ta jatkajie, ilmottau Karjalan kanšallisen ta alovehellisen politiikan ministerijö.
— Kielikurššit annetah hyvä mahollisuš opaštuo omua kieltä tahi šäilyttyä kielitašuo. Vepšän ta karjalan kielet kehitytäh, niih tulou nykyaikasie šanoja. Oppitunnit annetah pisyö kaikkien muutokšien jäleššä, täyventyä omua šanavaraštuo, keškuššella kielellä, lainuau ministerijö karjalan kielen kurššien opaštajan Uljana Tikkasen šanoja.
Kurššien ošallistujat šuahah Kanšallisen ta alovehellisen politiikan ministerijön tuvella painettuja opaššuškirjoja, šanakirjoja, kanšalliskielistä kaunokirjallisutta. Šamoin oppituntiloissa aktiivisešti käytetäh karjalankielistä Oma Mua -lehtie ta vepšänkielistä Kodima-lehtie.
Karjalan ta vepšän kielikurššija valtijotuvella vietetäh Yštävyštalon Resurssikielikeškukšen tiloissa vuuvvešta 2018.
Aihiešta voit lukie niise venäjäkši.
Yhty Oman Median Telegram-kanalah!
