Karjalan kanšalaisjärješšöt šuatih granttikannatušta
Karjalan piämiehen granttien fondi ilmotti vuuvven 2023 toisen granttikilpailun tulokšet. Niijen mukah 36 järještyö toteuttau omie projektija enši vuotena. Projektien rahotukšen miärä on 45 miljonie rupl’ua.
Voittajaprojektien toteuttamisen rajoissa Karjalašša vietetäh Karjalaisien kerähmö, valmissetah venäläis-vepšäläisen iänikiäntäjä, kehitetäh šuomelais-ugrilaisie turistimatkoja, pietäh toimenpitoja sosiaali-, urheilu-, opaššuš- ta kulttuurialoilla.
— Meijän projekti on “Kalevala: hahmojen tulkkauš”. Myö toteutamma šitä Paralleli-järješšön voimin Taitomusejon, Kanšallisen teatterin ta Tevollisušistorijan musejon avulla. Piätapahtuma on tuiskukuušša. Myö rupiemma tutkimah Kalevalan hahmoja teatteri- ta kuvataijošša, šelittämäh mitä hahmošša šäilyy ta mitein še auttau ymmärtämäh eeppistä runoelmua, šelitti projektin johtaja Irina Rinkevič.
Kilpailuh oli työnnetty 117 projektie Karjalan 14 piiristä ta kaupunkipiiristä. Kilpailun arvokomiisissa oli 40 spesialistie Karjalašta ta toisista Venäjän alovehilta šekä eksperttien neuvošto ta kilpailukomiisin arvoštelu.
Tietuo projektiloista voipi löytyä saitilta.
Aihiešta voit lukie niise šuomekši.
