Karjalan käsityöresidenssi keräsi muasterija eri alovehilta
Karjalan käsityöläisresidenssi yhisti pitsien kutojie ta keramiikkoja Venäjän alovehilta. Muasterin kymmenen päivän aikana valmissettih omie ainuluatusie töitä, kumpasien piäteemana oli pitsi.
Karjalašta ta Venäjän toisilta alovehilta tulluilla muasteriloilla valmissettih monipuolini ohjelma, kumpasen aikana pitsien kutojat ta keramiikot ošallissuttih opaššuštilaisukših, šuatih intuo ta valmissettih omie ainutluatusie taito-objektija.
— Residenssin vierahat käytih Karjalan taitomusejon Pohjosen luatu -näyttelyššä, jotta nähä, mitein ammattitaiteilijat käsitelläh Karjalan ta Pohjosen aihetta omissa tevokšissa. Kanšallisen musejon Pohjosen katrilli -näyttely esitti, mitein karjalaisien pukujen ompelijat pärjättih taitotehtävissä. Kiži-misejon Muanviljelijän mehaniikka -näyttelyššä vierahat šuatih tietyä, mitein rahvahan ajatuš luati teknillisie tehtävie. Näin, eri tehtävie voipi luatie käyttyän yksinkertasie taitokeinoja. Šamoin residenssin vierahat käytih Kiži-šuarella, kerto projektin ohjuaja Irina Vlasova.
Šamoin ošallistujilla vietettih ekskursijo Petroskoin valtijonyliopisson Kašvitiijollisešša tarhašša.
— Enšimmäisenä päivänä tutuštuma toini toisih ta luomistyöh, a toisena päivänä läksimä kašvitiijolliseh tarhah. Pitsissä käytetäh ušeita kašviornamenttija, šentäh muasterit löyvettih intuo tarhašta. Työt oikein erotah, joka muasteri tykkäsi mitänih omua, kerto pitsien kutoja L’udmila Šatalova Jelets-kaupunkista.
Karjalan käsityöläisresidenssi alko 23. heinäkuuta ta piätty 2. elokuuta.
Residenssin loppupäivänä Karjalan kanšojen yštävyštalošša piettih tapuamini, missä muasterit esitettih omie luomisprojektie.
