Karjalan halličuksen tuvel on avattu kalasyömizien zavodu

Uuzi zavodu rubieu valmistamah 50 000 tonnua kalasyömisty vuvves, sidä täydyy Karjalan kaikile kalankazvatuslaitoksile. Kuva: Karjalan tazavallan piämiehen lehtistöpalvelu

Karjalan halličuksen tuvel on avattu kalasyömizien zavodu. Se rodieu eräs suurimii Ven’an tämän alan laitoksii.

Akva Fid -kompanien uuzi zavodu rubieu ruadamah Kondupohjan Ber’ozovka-kyläs.

Allun zavodan ruadole pandih Karjalan piämies Artur Parfenčikov, uvven laitoksen ižändy NIkolai Fedorenko da hänen ruavon jatkai tytär Anastasija Fedorenko, kudai on Akva Fid -laitoksen piälikkö.

— Tänäpäi avaimmo nygyaigazen kalasyömizien valmistajan zavodan. Se on tärgei askel Karjalas akvakul’tuuran kazvattamizen tävven iččenäzen tuotandokierran luadimizekse. Tiä ruvetah luadimah korgeiluadustu produktua — biolougizesti turvallistu da hyödyllisty, kui kaloile mugai sen ostajile, sanoi Artur Parfenčikov omassah lehtistöpalvelule.

Zavodan avajazis Artur Parfenčikov palkičči laitoksen ruadajii Karjalan piämiehen kunnivomerkilöil "Karjalan tazavallan kehittämizeh panokses”.

Ber’ozovkan uvvel zavodal rubieu ruadamah lähes sadua opastunuttu spetsialistua, tulot paikallizeh b’udžiettah nähtävästi suuretah. Laitoksen luadimizeh on pandu lähes 1,8 miljardua rubl’ua.

Projektua todevuttajes autoi Karjalan halličus. Muga vuvvennu 2023 elokuus laitos sai sotsiualu-ekonoumistu kehitysty ennittäjän alovehen rezidentan stuatusan, se tarkoittau verohoivenduksii da toizii helpotuksii biznessah nähte.

Aihies voit lugie suomeksegi.