Karjalan eläjii kučutah svuad’bufestivualih
Perehen, suvaičuksen da uskolližuon päivänny kanzalline Rossija-keskus vuottau sulhazii da andilahii. Moskovas 8. da 9. heinykuudu pietäh kolmas kogo Ven’an svuad’bufestivuali. Sen pidäjät jo allettih ottua pakičuksii sih tapahtumah.
Pakičuksien vastahotandu algavui 21. sulakuudu da kestäy oraskuun 22. päiväh suate. Tämän vuvven festivualin aihe on ”Suvaičus yhtistäy”, se merkiččöysyväimien yhtevytty. Festivualin enzimäzenny päivänny pannah kirjoile Ven’an kaikkien alovehien sulhazii da andilahii, sih niškoi valmistetah pruazniekallizii yhtehmenendän pidoloi.
— Тuandoi myö alloimmo registratsien festivualih da hedi saimmo nuorien puaroin enzimäzii pakičuksii. Myö kannatammo perehien luajindua da kučummo kaikkien Ven’an paikoin eläjii menemäh kirjoih meijän suvaičuksen pruazniekas, kerdou kanzallizen Rossija-keskuksen piälikön sijahizen Anastasija Zv’aginan sanoi Karjalan piämiehen lehtistöpalvelu.
Tärgei ehto ozanottajile on moine: svuad’ban pruazniekkusovat pidäy valmistua kanzallizien perindölöin mugah. Festivualin toizennu piän pietäh luvendoloi, ekskursieloi, gastronoumientapahtumii da äijy muudu. Vuvvennu 2024 festivualis meni kirjoih yksi puaru Karjalaspäi, vuvven peräs – kaksi puarua. Karjalan eläjät voijah liittyö täh aktsieh andajen pakičustu täs.
Aihies voit lugie vepsäksegi.
Yhty Oman Median kanualah MAX:as!
