Karjalan eläjien arhiivaesinehie kerättih näyttelyh
“Karjala – piemmä huolta istorijašta” on Karjalan kanšallisen arhiivan vuotena 2020 toteuttama projekti. Šen keškitapahtumana oli näyttelyn järještämini.
– Näyttelyššä on vanhoja valokuvie, kumpaset arhiivoissa pietäh kallehina esinehinä, eryähissä valokuvissa on šen lisäkši kuvattu ainutluatusie tapahtumie. Esillä on olomašša vielä asiepaperija, muistoesinehie. Kaikki ne oli kerätty projektin aikana Karjalan eläjiltä, kumpaset tahottih, jotta heijän pereharhiivan esinehet olis šäilytty arhiivašša, šano Kanšallisen arhiivan spesialisti Jekaterina Jevsejeva.
Näyttely yhistäy Petroskoin, Kontupohjan, Priäžän ta Oneganrannan piirien eläjien istorijua. Niise projektin rajoissa piettih 10 šukutukimuštuntie koululaisilla.
– Mitä ei voi šäilyttyä koissa, arviivašša šäilyy ikuisekši. Toivomma, jotta kokoelma rupieu kašvamah, šano projektin toteuttaja, kanšallisen arhiivan ruataja Jelena Usačeva.
Näyttelyn avajaisissa kerrottih projektin toteuttamisen tulokšista, myönnettih šen ošallistujilla tovissukšie ta projektin ruatajilla kiitoškirjasie.
