Karjalan b’udžiettu: korrendua rahvahan eloksen tazuo
Zakonoinhyväksyndykerähmön deputuatat hyväksyttih toizes luvendas zakonanprojektan ”Karjalan tazavallan b’udžiettah niškoi vuvvekse 2026 da pluanukavvekse vuozikse 2027 da 2028”.
Tuloloi vuvvennu 2026 Karjalan kukkaroh vuotetah 77 miljardua 436 tuhattu rubl’ua, menot roitah 76 miljardua 850 tuhattu rubl’ua.
Kaikis menolois 63 % varua huavatah käyttiä valdivoprogrammoih, kuduat korrendetah rahvahan eloksen tazuo.
— Hyväksytty b’udžiettu tävvelleh turvuau tägevimii prioritiettoi: kaikkien sotsiualuvellalližuksien ehtotoi täyttämine Karjalan eläjien hyväkse, erillizeh voinuoperatsieh yhtynyzien da niilöin perehien kannattamine, sego Ven’an prezidentan sanottuloin kehityksen kanzallizien tavoittehien täyttämine, suau lugie Karjalan Zakonoinhyväksyndykerähmön Elissan Šandalovičan sanoi Zakonoinhyväksyndykerähmön saital.
Tazavallan valdivollizien laitoksien ruadajien palkoin suurendamizeh on kačottu 4, 3 miljardua rubl’ua. Kymmeneh kanzallizeh projektah, kudamih yhtyy Karjal, annetah 11, 3 miljardua rubl’ua.
Karjalan Tielöin fondah vuvvennu 2026 annetah 9, 5 miljardua rubl’ua, niilöis 5 miljardua 680 tuhattu työtäh autotielöin da silloin rakendamizeh, uvvistamizeh da kohendamizeh.
Piäl 213 miljounua rubl’ua pietäh Petroskoin, Karhumäin, Suojärven, Priäžän, Anuksen da Dvorčan tielöin kohendamizeh. Petroskoin nellän školan da Puudogan piirin kahten školan perustehellizeh kohendamizeh ližätäh 172 miljounua rubl’ua. TOS:oin projektoih annetah 25 miljounua, erillizeh voinuoperatsieh yhtynyzien perehien kannattamizeh — 50 miljounua.
Elissan Šandalovičan sanoin mugah ruado vaste algavuu. Yhtes Karjalan piämiehen, Karjalan haldivon da tazavallan edustajien kel Federuallizes kerähmös deputuatat ruvetah ruadamah tuloloin suurendamizekse da federuallizen den’guavun suamizekse.
Aihies voit lugie suomeksegi.
Yhty Oman Median kanualah Telegramas!
