Karjalan ajonevvot kehitytäh: rodieu uuzii reissuloi
Karjalas jatketah transportan sistieman parendamistu. Mennyön vuvven ruadolois saneltes Karjalan piämies Artur Parfenčikov kerdoi sih nähte, ku tazavallas tahtotah kehittiä uuzii lendomatkoi, avtoubusoin, raududorogoin da sähkojunoin yhtevytty.
Vuvvennu 2025 Karjalas palveltih läs 1000 lendoreissuu da tuodih enämbi 80 tuhattu matkailijua. Nygöi Petroskoispäi on 8 lendosuundua, kudamih kuuluugi uuzi reissu Mahačkalah. Karjalan eläjien pakičuksien mugah allettih valmistua rahvahienvälisty lendoyhtevytty Minskah: enzimäine reissu Valgoven’an piälinnah rodieu 3. oraskuudu. Tänä vuon tahtotahgi luadie reisut Murmanskah da Samarah.
Sen ližäkse kehitetäh raududorogoin yhtevytty. Kezän junoin aigulistal on jo 18 suundua eri paikkoih. Matkustajien lugu sil alal on 24 protsentua. Segežan alovehen eläjien pakičuksien mugah Segežan da Vojačun välis voibi ajelta ymbäri vuvven.
— Uuzii lendomatkoi luadijes otetah huomivoh Karjalan eläjien da gostien kyzyndöi, alovehienvälistu yhtevytty kehitetäh paikallizien eläjien toivomuksien mugah, kerdou Sampo TV 360 omassah tiedottehes.
Petroskois ruadau linnan sähköjuna: mulloi se vedi läs 140 tuhattu hengie. Linnan haldivo kaččou uuzien raududorogustansieloin luajindua. Sidä paiči mulloi Karjalan piälinnah ostettih 28 avtoubussua. Alovehien välis avattih avtoubusan uuzii reissoi Videleh Priäžän piirin kylien kauti da Hirvahan suundah.
Yhty Oman Median kanualah MAX:as!
