Agrostartap-kilpailun tulokšista ilmotti Karjalan piämieš Artur Parfenčikov omalla VK-šivulla. Piämieš onnitteli voittajie ta kirjutti kilpailun tärkeyveštä fermerilöillä.
– Lahenpohjan piirin Kortela-pos’olkan fermerin Sergei Avetis’anin talouvešša on kakši lehmyä ta kakši vasikkua. Grantin rahoilla fermeri šuunnittelou rakentua lehmänliävän nykyaikasen lypšysistemin kera ta lisätä oman karjan, jotta šiinä olis 30 piätä lehmyä, kirjutti Artur Parfenčikov.
Šen lisäkši Karjalan piämieš kerto Jevgenii Provorovista Lahenpohjašta. Fermeri tahtou kašvattua manšikkua. Grantin rahoilla mieš meinuau oštua issutušmaterialie ta tippakaštelusistemin, mitä šamoin käytetäh lannottamisešša.
– Fermeri Ksenija Sadukova jo nellättä vuotta kašvatau marjua. Alotti manšikašta, a nyt šen lisäkši kašvattau ni kuušamie, juopukkua, malinua. Tänä vuotena Kontupohjan piirin Bol’šoje Voronovo -kyläššä naisen issuttamie marjoja kašvau jo yli 2,5 hehtarin alovehella. Fermeri käyttäy grantin rahat issutušmaterialin ta aštuvan oštamiseh, šelvitti Karjalan piämieš Artur Parfenčikov.