Karjalan 11 koulumusejuo tavottelou muan parahan šivissyšprojektin arvuo
Karjala ošallistuu Venäjän koulumusejojen kilpailun anomušhommih. Eniten anomukšie tašavalta lähetti Tuatonmuan puoluštajien muissolla omissettu paraš näyttely- ta Paraš istorijallini näyttely -nominatijoissa. Kuuvven musejon ruatajat koroššettih, jotta vietetäh koululaisilla erikoisšotaoperatijolla omissettuja tilaisukšie, ilmottau Karjalan tašavallan piämiehen lehistöpalvelu.
— Rukajärven koulun istorija- ta kotišeutumusejo šäilyttäy yli 2000 näyttelyesinehtä. Näyttelyt kerrotah vanhašta Rukajärven kyläštä, koulun istorijašta, 27. ampumadivisijonašta, Vper’od-partisanijoukošta ta erikoisšotaoperatijon ošallistujista, lehistöpalvelu kertou tiijotukšeššah.
Latvan 4. koulun musejošša näyttely esittelöy taiteilijan Tamara Jufan tevokšie.
— Koulumusejojen kilpailu näytti šuurta kiinnoššušta patriotismin ta kulttuuriperinnön aiheih. On miellyttävä, jotta projektih ošallistuu 18—89-vuotisie koulumusejojen johtajie, opaštajie ta koulun johtajie. Heijä tarkotuš on šäilyttyä ta välittyä tulijilla šukupolvilla meijän muan kallista istorijallista ta kultturista perintyö, šano Tieto-šeuran varapiäjohtaja Kirill Hvil’.
Koulumusejojen kilpailun rajoissa on jo vietetty noin 1000 erilaista tilaisutta. Loppukuot’t’elukšet ta palkintaseremonija pietäh šajekuušša Muisto on elošša -forumissa Moskovašša.
Kilpailu on järješšetty presidentin Vladimir Putinin käšyštä Venäjän Federatijon Šivissyšministerijön tuvella.
Aihiešta voit lukie niise šuomekši ta vepšäkši.
Yhty Oman Median MAX-kanalah!
