Karjalaisilla tuottehilla oma ošašto verkkokaupašša
Karjalašša valmissettuja tuottehie on myönnissä muun muašša verkkokaupoissa. Nyt niijen ošto Ozon-verkkokaupašta on helpottun. Tuottehet kerättih yhteh Valmissettu Karjalašša -katalogih.
— Katalogi tariččou yrittäjillä mahollisuon šuaha lisyä näkyvyyttä ta lisätä merkittäväšti paikallisien tuottehie myöntie, kerrottih Karjalan Sanomilla tašavallan tevollisuš- ta kauppaministerijöštä.
Verkkokaupašta löytyy Karjalašša valmissettuja elintarvikkehie kuin esimerkiksi kaštikkehie ta hvaren’n’oja. Elintarvikkehien lisäkši Valmissettu Karjalašša -ošaštošta löytyy kosmetiikkua, lapšientuottehie ta ašuštehie. Nyt luvetteloh kuuluu yli tuhat tuotehta.
— Tuottehien luvettelo luajenou jatkuvašti. Šiih voit piäššä vaikka mi Karjalašša valmissettu tuoteh. Anomukšen tuottehen lisyämiseštä listalla on lähetettävä Karjalan tevollisuš- ta kauppaministerijön šähköpoštiatressih, kerrottih Karjalan Sanomilla viraššošta.
Ozon ei ole ainut Venäjällä toimija monialani verkkokauppa. Šuurimpien nettikauppojen joukkoh kuulutah toisien lisäkši Megamarket ta Wildberries. Karjalašša valmissettuja tuottehie löytyy molommista šivuštoista, ka erillisie listoja noissa kaupoissa ei ole.
— Valmissettu Karjalašša -katalogi on tarvis niise Wildberries-verkkokauppah. Še lisyäy paikallisien tuottehien tunnuššušta, šokolatie- ta juuštotryffelijä käsityönä Petroskoissa valmistaja Svetlana Žuravl’ova kertou.
Aihiešta voit lukie niise šuomekši ta vepšäkši.
