Karjalaisien kerähmön valtuutettujen neuvošto piti kokoukšen
Karjalaisien IX kerähmön valtuutettujen neuvošto keräyty, jotta käsitellä karjalaisien statussan kyšymyštä. Väenlašennan tulokšien mukah karjalaiset pitäy hyväkšyö vähälukusien kantakanšojen luvetteloh.
Issunnon alušša Karjalaisien IX kerähmön valtuutettujen neuvošton johtaja Raisa Samodajeva kerto viime vuuvven toiminnan tulokšista: missä neuvošto kävi ruatomatoilla, kenen kera onnistu vaštautuo ta mistä šopie.
Šen jälkeh piti piättyä mitä ruatua, jotta karjalaiset hyväkšyttäis Venäjän vähälukusien kantakanšojen luvetteloh.
— Viimesen väenlašennan tulokšien mukah karjalaisie on vähemmän kuin 50 000 ihmistä, šentäh kanšalla on oikeiuš šuaha tämän statussan. Myö piättimä kirjuttua vetomuš Karjalan piämiehellä Kerähmön nimeltä ta šiitä pitäy ilmottua tašavallan joka piirissä, mitä tämä statussa antau kantakanšalla, jotta Karjalan hallituš šais myöntesie piätökšie piirilöistä, šelitti neuvošton johtaja Raisa Samodajeva.
Neuvošto šuunnittelou valmistua vetomuš piämiehellä kevätkuušša, šiitä kerähmön jäšenet ruvetah ilmottamah lajista ta selittämäh šen oikeukšie rahvahalla.
Venäjän hallituš luatiu piätökšen vähälukusen kantakanšan statussan hyväkšymiseštä šen jälkeh kun šuau ehotukšen tašavallan toimehpanijavallalta.
Issunnošša niise noššettih kyšymyš Karjalaisien X kerähmön pitämiseštä, kumpani tulou jo enši vuotena.
