Karjalaiset hiät näytettih Pervii-kanavalla
“Piemmä häitä” on federalisen Pervii-kanavan ta Internetin kehityšinstituutin yhtehini projekti. Kuvaukših otettih antilaškylyn ritualie ta häijen päivyä. Kylypäivyä kuvattih Lohijärven rannalla ta hiät vietettih Šuuršelän kyläššä.
Hiäparin miehellä Sergei Ryppijevillä on karjalaiset juuret, a Anna-moršien on venäläini. Onnakko karjalaini kulttuuri on lähini molommilla.
— Myö šuoštuma ošallistuo projektih, jotta šuaha uutta kokemušta ta tuntehie šekä šuaha tietyä hiäkulttuurista. Oli mukava ruatua kuvaušryhmän kera, kuvaukšet keššettih nellä päivyä ta niijen aikana meistä tuli niin kuin šuuri pereh. Meijän hiät tultih šielun pruasniekakši ta muinaisperintehien šäilyttämispivokši, korošti moršien Anna Ivanova.
Kuvaukših otettih antilaškylyn rituali. Še piettih uuvvešša kylykompleksissa Lohijärven rannalla. Pivon vietti karjalan kielen ta kulttuurin tietäjä Natalja Vorobei.
— Mie ušon šanan voimah ta ušon šiih, jotta perinneh eläy, kuni še muuttuu. Šentäh še tuli hyväkši esimerkiksi, mitein vanha rituali voipi šopie nykyaikaseh elämäh. Juštih tämä rituali on valkieta taikua ta še tuou hyvyä kaikilla, ken šiih ošallistuu, šelitti Natalja.
Natalja Vorobei lisäsi, jotta kuvaukšissa hiän käytti karjalan kieltä.
Projektin tuottaja koroštau, jotta antilaškylyn rituali jiäy muistih ta kaunistau filmie.
— Myö tahtoma kuvata karjalaisie häitä juštih ulkoilmalla karjalaisešša kyläššä, šentäh kun ylen šuvaičemma Karjalan luontuo. Oli oikein mukava šelvittyä, miten karjalaisien hiäperintehet erottih toisien kanšojen perintehistä, kerto idejan kekšijä ta projektin luova tuottaja Sofja Ernst.
“Piemmä häitä” on filmien šarja, kummaista näytetäh federalisella Pervii-kanavalla. Karjalaiset hiät -filmie šuau kaččuo kanavan nettišivulla.
Aihiešta voit lukie niise šuomekši.
