Karjalašša piätty viiješ Karjalaini šuarna -festivali-kilpailu. Šiih otti ošua yhekšän ryhmyä ta noin 80 henkie.
Kilpailuo vietettih kolmešša nominatijošša. Miun šytämen runot -nominatijošša voitti Petroskoin šuomelais-ugrilaisen koulun opaštuja F’odor Ovčinnikov. Hänen esityš pohjautu “Kalevalan” toiseh runoh. Ohjuajana oli opaštaja Tatjana Ignat’kova.
Starinamaini vakkani -nominatijošša voitti Julija Jegorovan ohjuama Vieljärven keškikoulun Tähkäni-ryhmä, kumpani lavašti venäläistä Kišša ta kukko -starinua.
Kanšallini starina -nominatijošša voittajakši tuli Aunukšen piirin Zv’ozdočka-päiväkojin valmissušryhmä, kumpani esitti venäläistä Teremok (Kotini) -starinua.
– Esitykšen aikana henkilöt tultih lavalla ta luvettih iäneh runoja. Lisäsima uuvven henkilön – kiššan. Esityš mäni päiväkojin karjalaisešša korničašša. Iče löysimä tarvittavie atribuuttija, ompelima pukuja, kertou valmissušryhmän ohjuaja Natalja Romanova.
Kilpailun arvoštelijina oltih Karjalan kanšallisen teatterin näyttelijät Tamara Voronova ta Ol’ga Malinina šekä karjalaisen Čičiliušku-kanšanteatterin johtaja Natalja Golubovskaja.
Kilpailun voittajie palkittih Karjalan kanšojen Yštävyškojissa talvikuun 8. päivänä.
Karjalaini šuarna -kilpailun järještäjänä on paikallini Pyhäjärven juuret -kanšalaisjärještö. Festivalie vietetäh Karjalan tašavallan kanšallisen ta alovehellisen politiikan ministerijön kannatukšella. Tilaisuon tarkotukšena on šäilyttyä ta kehittyä karjalan kieltä šekä vetyä lapšie ta nuorisuo mukana etnokulttuuritoimintah.