Karjalaini netäli: Aunukšen eläjät tuttavuššutah karjalaisuoh
Aunukšen linnašša pietäh Karjalaista netälie. Nellän päivän aikana voipi tutuštuo Karjalan kulttuurin eri puolih.
Toimenpitojen šarjua järješšetäh Aunukšen lisäopaššukšen keškukšešša ta Lindu-etnokulttuurikeškukšešša. Netälin avajaiset vietettih opašretkellä kanšallisešša musejošša, käsitöijen näyttelyn avuamisella ta Kummaline Karjalan mua -konsertilla. Šarjan päivie on täyšie pitoja lapšilla ta aikuhisilla. Lapšet tuttavuššutah karjalaisien starinojen šankariloih, käyväh käsityötunnilla. Varmašti hyö ičeki ollah tapahtumien ošallistujina ta esiinnytäh konserttiloissa, näytetäh omie neroja.
— Aktijon joka päivä on omissettu omalla teemalla: Musiikillini Karjala, Käsityömuasterien päivä, Leikkien päivä. Lapšet ta aikuhiset voijah viettyä aikua yheššä ta tuttavuštuo karjalaisih neroloih, kieleh, taitoh, perintehih, šelitettih aktijon järještäjät.
Piätinččänä on aktijon loppupäivä. 28. šajekuuta Aunukšen lisäopaššukšen keškukšešša pietäh konferenšši "Kieldy da perindyö joga pereheh". Päivän huomenešpuolella esitetäh šeloššukšie ta iltapuolella pietäh muasteri-oppien šarjua.
