Ištund: Sur’ homaičuz Karjalan igähižiden rahvahiden kul’turanjäl’gendusen kaičendaha
Petroskoiš mäni Karjalaižiden, vepsläižiden da suomalaižiden ištund Karjalan pämehen ohjandusel. Avaites ištundad Karjalan pämez’ Artur Parfenčikov eziti uzid Ištundan ühtnikoid i homaiči, miše üks’ tärktembiš Valdmehišton teišpäi om Karjalan igähižiden rahvahiden kul’turan- da kelenjäl’gendusen kaičend da kehitoitand, mi abutab hüvin kehitoitta kodiröunad.
Ištundal pagištihe Venäman rahvahiden kul’turjäl’gendusen voden satusiš, kaikiš azjtegoiš, miččid mänetadihe muloi Karjalan valdkundas. Mugažo letihe mugoine tärged küzund, kut Karjalan igähižiden rahvahiden hengižen kul’turan- da kelenjäl’gendusen kaičend.
Kelen, literaturan da istorijan institutan fonogrammarhiv – nece om suremb Venämal kaičuztaho, kus oma eläban paginan erazvuiččed žanrad, miččid änetadihe kassetale ekspedicijoiden aigan. Fonogrammarhivan materialoid keratihe enamba 100 vot. Sen päkal’huz’ om äikeližuz’.
— Pidab kaita nenid materialoid. Niid pidab tarkašti kundelta, kirjutada tekst, miše oliži sel’ged, miš om pagin, käta venän kel’he i sistematiziruida. Sen täht meile tariž ezmäi kaiked vepsän da karjalan keliden tundijoid, mugoižid specialistoid ei täudu institutas, sanui Kelen, literaturan da istorijan institutan varapämez’ Svetlana Jalovicina.
Ištundal oli tarutud tehta elektronine kirjišt, kus voib keskitada hengelišt kul’turjäl’gendust.
— Nece om tärged tem ei vaiše Karjalan täht, no Venäman-ki täht. Meiden tegend om säta alanduz sidä kesken materialine i panda se küzund federaližiden azjtegoiden planha, jatkata radod korktembal tasol, sanui Artur Parfenčikov.
Sures panendas vepsän kelen da kul’turan kaičendaha ištundan aigan Vepsän kul’tursebran ühtnikale Svetlana Pas’ukovale anttihe Karjalan valdkundan kitändkirjeine.
Uzištoid neciš temas voib lugeda mugažo karjalaks.
