Karjalaižen Pakaižukon rezidencii vasttab adivoid kezal
Karjalan Matknikoiden tedotelendkeskuz sädi turistorganizacijoiden ezitajiden täht ajeluz karjalaižen Pakaižukon kodihe — “Talviukko”-rezidencijaha. Kezan tulend vajehtab lebun formatoid da taričeb adivoile uzid melentartuižid kezaprogrammoid, siš tedotadas Karjalan ekonomižen kehitoitusen ministerstvas.
— Keza tuleb ani pigai, i olem vaumhed ozutada rezidencijan uzid kezaprogrammoid da vastata matknikoiden joukuid, sanui Natalja Stol’arova, “Talviukko”-rezidencijan pämez’.
Semendkuspäi sügüz’kuhusai Pakaižukon rezidencijas radab kaks’ programmad: “Pohjoine saga” da “Karjalan ezitanaz”. Adivoid varastaba XVII—XVIII voz’sadoiden ezitanaz da eläb karjalaine pert’, kus om ozutadud tradicionaližid radonmahtoid. Sen ližaks adivod voiba ühtneda kruuga-karguhu da väta rahvahan aktivižihe vändoihe. Programmad om vaumištadud kogonaižen kanzan täht, ned linneba mel’he kut lapsile, muga aigvoččile-ki.
Kezal sur’ homaičuz kingitadas kosketusihe ristituiden da londusen keskes. Adivod voiba astta turistmatkadme mecan kal’t, a pidust’ tropašt om etnografižid ekspozicijoid. Rezidencijan mal eläb pohjoižpedroid, sebrakahid haski-koirid, kodilinduid da Nubian kozid. Adivoil linneb voimuz varumatomašti sötta živatoid da fotografiruida niid, a mugažo kalatada.
— Kezaräkes rezidencii andab ristituile todesišt viluhkod mecad. Pakaižukon kodi om läz Petroskoid, sen londusen tünüz’ da kehitoittud infrastruktur mel’dütoitaba matknikoid, tegeba rezidencijad lujas popul’arižeks sijaks lühüdoiden turistajelusiden täht, jagoihe ičeze tundmusil “Nordic Travel” -turistorganizacijan pämez’ Konstantin Simonov.
Tarkištele "Oma Median" MAX-kanalad!
