Karjalah avavui yhestostu modelikirjasto
Segežan kirjasto rodih kul’tuurukeskuksekse. Nygöi kirjastos on uuzi abonementu, konferents-zualu da perti eri kerähmölöih niškoi. Kirjastos ruadau Karelija folk -kanzoinväline keskus, nuorii onnuako miellyttäy mediapunktu “Prošu slovo!”, a oman rannan histourieh kiinnostunnuzih niškoi on luajittu Kodi Segeža -nimizet tilat.
— Nygöi meijän kirjasto ei ole vaiku kniigoin lugemizen paikku, se on kohtu, kus vpoibi ruadua eri ruadoloi, täs jogahine löydäy ičele mieliruavon. Se andau mahton ozuttua omua ičcie, suaja uuttu neruo, se vedäy omah puoleh kaikkii, sanou Segežan keskikirjaston ruadai Regina L’uttina.
Modelikirjastos nygöi ollah kangaspuut — voibi opastua rahvastu kudomah, on tiedokoneh, kudual on hyvä lugie kniigoi, ollah suadavis söhköllizet resursat LitRes, NEB, KonsultantPl’us. Uvvistettuh kniigufondah kuuluu 4 500 uuttu kniigua.
Kul’tuuru-kanzallizen projektan hyvyös vuvves 2019 Karjalas on luajittu 11 modelikirjastuo. Net ollah Segežas, Sordavalas, Kondupohjas, Belomorskas, Kalevalas, Jänišpuoles, Mujejärves, Värtsiläs, Helyläs, Borovois da Kotkatjärves.
