Karjala: turistoin lugu kazvoi kolmandekse
Karjalah tulijoin turistoin lugu kazvoi kolmandeksel, rahvas luajitah vuvves puolitostu miljounua matkua meijän tazavaldah. Moizet luvut ilmoitettih istundos, kudai oli omistettu kezän aigah valmistumizele da tazavallan turizmualan kehittämizele. Istundoh yhtyi valdivovallan herrua, turizmulaitoksien ruadajua da turistoin vedäjiä.
— Turizmuala endizelleh ozuttau pyzyviä kazvuo. Mennyt vuvven tiedoloin mugah tazavaldah oli 35 % matkua enämbi ennemullostu. Vuodessah 2030 turistoin matkoin lugu on suurendettavu kolmeh miljounah suate, sanoi istundos Karjalan ekonoumizen kehityksen ministru Anton Fokin.
Istundos paistih, kui tärgei on keviän-sygyzyn aigah säilyttiä palvelun korgei tazo da luadie transportu helpoh suadavakse. Mennyt vuon Petroskoih luajittih suuri azetuskohtu raudutie- da autoazeman välih. Paiči sidä luajittih uvvet da kohendettih endizet ajotiet Videlen, Kin’alahten da Vieljärven välis, kudamien kauti voibi piästä Kinnermäle. Lendokonehil nygöi voibi piästä Jekaterinburgah, Kazanih, Kaliningruadah, Moskovah, Mahačkalah, Sočih da Mineral’nije vodi -linnah.
— Oraskuun 3. päiväs algajen voibi piästä Minskah. On vie kaksi uuttu suundua — Murmansk da Samara, sanoi istundos Larisa Kn’azeva, Petroskoin aeroportan varapiämies.
Ruadoistundos paginal oldihgi turistoin azetuskohtat. Tazavallas on lähes tuhattu mostu kohtua, kudamih voibi sijoittua enämbi 20 tuhattu hengie. Vaigu mennyt vuon Karjalas oli avattu 13 uuttu hotelii.
Aihies voit lugie suomeksegi.
Yhty Oman Median kanualah Telegramas!
