Karjala sai enamba 62 millionad rubl’ad turistnalogan taguiči
Vodel 2025 Karjalan rahatulod turistnalogaspäi oli enamb 62,6 millionad rubl’ad. Siš “RBK” -portalale tedotadihe Karjalan ekonomižen kehitoitusen ministerstvas. Sil vodel turistnalogaks tehtihe 1% ödundmaksuspäi. Kaikid surembad rahatulod turistoilpäi sai Petroskoi (22,2 millionad rubl’ad), a mugažo Sortavala-lidnan ümbruzkund (enamba 16 millionad rubl’ad) da Kondopogan rajon (8,6 millionad rubl’ad).
Turistnalog tariž maksta organizacijoile da ristituile, kudambad andaba turistoile ösijad oteliš, pertiš da adivpertiš. Vodel 2026 nece nalog ei voi olda enamb 2 % ödundmaksuspäi, vodel 2027 — 3%, vodel 2028 — 4%. Vodelpäi 2029 turistnalog tehtas 5-procentižeks. Turistnalogad ei tariž maksta rahvahanikoiden vällenduzkategorijoile: veteranoile, saubatud Leningradan enččile eläjile, invalidoile i m. e. Kaiken ližaks, turistnalogad ei tariž maksta Karjalan eläjile, konz hö ajeleba toižihe Karjalan rajonoihe da lidnoihe.
— Vodel 2026 varastadas, miše rahatulod turistnalogaspäi kazvab: endustusen mödhe, ned voib olda 100 millionad rubl’ad. Voden 2026 ezmaižen voz’nelländen nalog jäb enččen (1%), sid’ tehtas 2-procentižeks, sel’genzoitihe Karjalan ekonomižen kehitoitusen ministerstvas.
Turistnalog zavottihe kerata voden 2025 augotišes. Sil vajehtadihe kurortmaks, mitte aigemba keratihe erasiš Venäman regionoiš. Nügüd’ jogahižen municipalitetan valdmehed iče pätaba, otta-ik turistnalogan vai ei, no vodehe 2030 nece nalog planuitas tehta kaikiš Karjalan lidnoiš da rajonoiš.
Mihe oigeta rahatulod turistnalogaspäi, sijaližed valdmehed pätaba iče. Ozutesikš, Petroskoiš da Sortavalas mugoižed rahatulod oigetas erasiden lidnan sijoiden paremboitusehe da kohendusehe.
Tarkištele "Oma Median" Telegram-kanalad!
