Karjala otti ošua Šukat šotilahalla -aktijoh
Jessoilan eläjä Svetlana Vsevolodova ilmotti Šukat šotilahalla -aktijon käsityömuasteriloilla. Hyvänluajinta-aktijoh otettih ošua Jessoila, Nuožjärvi, Säpsä, Čalna, Petroskoi. Nyt käsityömuasterit omin käsin tikutetah villašukkie, šormikkahie ta kintahie meijän mobilisoituja kanšalaisie ta vapuaehtosie varoin. Ihmiset, kumpaset ei šuateta tikuttua, alettih työntyä rahua lankah.
— Mie piätin alottua šemmosen aktijon, jotta auttua šotilahie šillä, mitä myö, naiset, hyvin šuatamma. Još myö tikutamma villašukkie, ni ne ei ainuoštah lämmitetäh heitä, ka i šamalla šuojellah kaikešta pahašta. A ken vielä auttau meijän poikie, vellie, miehie, još emmä myö, kertou Svetlana Vsevolodova.
Käsityömuasteri šanelou, jotta aktijoh ošallissuttih ni koululaiset — hyö piiruššetah kuvie ta kirjutetah niih lämpimie šanoja šotilahilla. Piiruššukšet pannah šukkien šiämeh.
Još tahot ottua ošua Šukat šotilahalla -aktijoh, ni muissa, jotta šukan varši pitäy olla 20—25 šentin pituvuini, a kintahissa pitäy tikuttua kuin šuuri, niin ni etušormi, kuin mečäštäjien kintahissa.
Valmehet šukat ta kintahat voit tuuvva atressilla: Petroskoi, Dzeržinskin katu, 3. Šamoin voit ottua yhtevyttä aktijon alkuhpanijah VK-sosialiverkošša.
Aihies voit lugie suomeksegi.
