Karjala ühtneb “Rusked neilikoine” -ühthižvenälaižehe hüväntegijaha akcijaha
10. sulakud zavoidiše “Rusked neilikoine” -ühthižvenälaine hüväntegii akcii. Sen aigan kaikutte Karjalan eläi sab voimusen abutada voinveteranoile.
Miše ühtneda akcijaha, tariž vaiše ostta “Rusked neilikoine” -rindznamaine miččes taht verklaukas. Mugažo nenid rindznamaižid möba “Vägestusen volont’orad” -sebran ühtnikad, kudambid voib vastata keskuzirdoil, puištoiš da suril azjtegoil. Volont’oran päl oma specialižed sobad “Rusked neilikoine” -akcijan simvoloidenke, a heiden käziš om koroboid, kuna keratas rahoid hüvile tegoile. Sen ližaks ostta znamaižen voib akcijan partn’oroil: “Počta Rossii” -erištoiš, kaikid surembiš internet-laukoiš, edahaižen matkan RŽD:n pojezdoiš.
Kaik rahad oigetas “Sugupol’viden mušt” -organizacijan hüvähtegijaha fondaha, niil osttas zellid, tervehtumižen kaluid. Nenil rahoil tehtas leikatusid voinveteranoile da äi tošt.
— Karjalas abu Fondalpäi sai 267 veteranad da kaks’ organizacijad, se oli enamba 24 millionad rubl’ad, tedotab Karjalan Pämehen press-služb.
“Sugupol’viden mušt” om Venäman üksjaine kommercijatoi organizacii, mitte vodelpäi 2015 abutab voinveteranoile hüvähtegijan fondan abul kogonaižel Venämal. Nügüdehesai nece Fond abuti enamba 20 tuhale veteranale da 144 tervhuz- i socialižele organizacijale. Kacta raportoid anttud abus kaikuččel kul pandas Fondan oficialižel lehtpolel.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
