Karjala germanilaižen taidehpirdajan sil’mil
Karjalan Rahvahaližes muzejas mäni “Rad da uništused. Genrih Fogeleran pirdatused 1930.-voziden Sovetskijas Karjalaspäi” -kirjan prezentacii.
Uz’ projekt om Karjalan Rahvahaližen muzejan, suomalaižen kirjutajan Ossi Kamppižen da kändajan i muzikmehen Arto Rinnen ühthine projekt. Kirj starinoičeb Karjalan rahvahan jogapäiväižes elos 1920.- da 1930.-vozil. Sen pohjaze om pandud tetaban germanilaižen runoilijan da taidehpirdajan Genrih Fogeleran pirdatused, miččed kaitas Karjalan Rahvahaližen muzejan fondas.
— Kirj om abunik necen aigkeskustan Kajalan oppimižes. Kactes pirdatusihe voib rižada taidehpirdajan armastust Karjalaha, sanui Karjalan Rahvahaližen muzejan pämez’ Mihail Gol’denberg.
Genrih Fogeler oli Karjalas nel’l’ kerdad — vozil 1925, 1933, 1934 da 1936. Edel Surt voinad Karjalan Rahvahaližen muzejan fondas oli hänen 132 pirdatust. Voinan jäl’ghe kaičihe vaiše 95 — kaik ned om paindud udes kirjas.
