Karjala da Jugra: vähäluguižiden rahvahiden socialiž-ekonomine kehitoituz
Radjouk Hanti-Mansiiskan ümbrištospäi tuli Karjalaha, miše vajehtadas vähäluguižiden rahvahiden socialiž-ekonomižen kehitoitusen mahtištol i kožudas ühthižrados. Petroskoiš mäni paginištund, mitte oli omištadud vähäluguižiden rahvhiden socialiž-ekonomižen kehitoitusen küzundoile. Azjtegoho ühtniba Venäman Senator, Pohjoižen, Sibirin i Edahaižen Päivnouzman igähižiden vähäluguižiden rahvahiden associacijan prezident Aleksandr Novjuhov, Venäman Valdkundaližen duman deputat Valentina Pivnenko i toižed korktad adivod.
― Tämbei mö pagižem peniš rahvahiš. Meil oma bohatad tradicijad, istorii da čoma tulii aig. Meid om vähä, no mö olem vägekahad, – tervehtoiti ištundan adivoid Ol’ga Šmajenik, Zakonoiden tegendan kundan deputat.
Ištundal pagištihe vähäluguižiden rahvhiden kul’turjälgestusen kaičendas, elotahoiden kävutandas, tradicionaližen elon vedändas, ristituiden oiktusiš da tuges, a mugažo valdmehišton da kundaližiden sebroiden ühthižrados.
― Karjalas eläb igähine vähäluguine rahvaz — vepsläižed. Valdkund andab sur’t homaičust ei vaiše vepsän kelen da kul’turan kaičendaha, mugažo täs kehitoittas da paremboittas heiden elontahoiden sijoid, kaitas heiden tradicionaližid radoid, sanui Karjalan sijaližiden azjoiden varapämez’ Roman Golubev.
Tehtes ühthevedoid Aleksandr Novjuhov homaiči, kut om tärged pidäda dialogad valdmehišton, vepsläižiden ezitajiden da tegeližiden radištoiden keskes. Nece abutab süvemba el’geta ühthižid tegendoid i löuta niiden pätusid valdkundan kehitoitusen hüvüdeks.
