Karjala da Indii: ies on yhtehisty ruaduo
Ven’an Tiedoakadeemien Karjalan tiedokeskuksen piälikkö Ol’ga Bahmet allekirjutti memoranduman Indien Bangalor-linnan Čakanjan yliopiston kel. Dokumentu on allekirjutettu viijekse vuottu da tuliekse sidä voibi jatkua.
— Myö tervehtämmö uuzii partn’ouroi, meil on äijy ruadokogemustu, kuduah nähte hyväl mielel sanelemmo. Tulii askel yhtehizeh ruadoh roih syvyskuus piettävy ekspertuistundo, kudamale myö rakkahal vuottazimmo kolleegoi Čakanjan yliopistospäi, sanoi Karjalan tiedokeskuksen piälikkö Ol’ga Bahmet´tiedokeskuksen lehtistöpalvelule.
Memoranduman Indien puoles on allekirjutannuh Čakanjan yliopiston professoru Sušant Džoši. Ven’an puoles dokumentan allekirjuttamizen pidoh yhtyi Karjalan Tiedokeskuksen piälikön nevvoi, Pohjazen veziprobliemoin instituutan piälimäine tiedoruadai Nikolai Filatov. Ruadomatkan aigah Nikolai Filatov tärgevimän kučutun roulis yhtyi kanzoinvälizeh konferensieh ”Ekolougine pyzyvys da adaptatsien strateegiet ilmaston muuttumizeh”, kudai piettih Belagavi-linnan Tehnolougizes yliopistos.
Karjalan tiedokuskuksen da Čakanjan yliopiston ruado rubieu koskemah moizii kyzymyksii, kui veziresursoin käyttämine, ilmaston muuttumizen vaikuttamine, parniekkuguazuloin virroin tutkimine veziekosistiemois, veziobjektoin säilyttämine da eloittamine da toizet.
— Indies ollah hyvin kehitetty gidrolougieh sivotut tiedoalat. Tiä pietäh perinpohjazii tutkimuksii da suajah nägyvii praktiekkutuloksii. Sen voibi ellendiä, ku eläjile pidäy turvata puhtastu juodavua vetty, sidä pidäygi muatalovuon kehittämizekse, pani merkile muantiijon tiedodouhtoru Nikolai Filatov.
Tiedomies saneli meijän muan veziresursoih da probliemoih nähte, kudamii on meijän suuril järvil: Luadogal, Oniegal, Baikal-järvel da Kaspiiskoil merel. Muailman ilmaston lämbiemizen periä jälgimäzet 60 vuottu nägyväl suureni joven virdavuksen ližävys.
— Enziallus meil kolleegoin kel pidäy šeikkuperäizesti paista tärgevimis probliemois. Ielleh rodieu yhtehizii tutkimuksii da tiedokirjutuksii, ližäi Nikolai Filatov kahten laitoksen yhtehizes ruavos paistes.
