Karjalašša valmistauvutah Šanelu karjalan ta vepšän kielellä -aktijoh

Viime vuotena Šanelu karjalan ta vepšän kielellä -aktijo oli omissettu Šuuren Voiton 80-vuotispäivällä. 6+ Kuva: Irina Zaitseva

Kulujana vuotena perintehellini alovehien välini Šanelu karjalan ta vepšän kielellä -aktijo mänöy 20.—26. šulakuuta. Še on omissettu Venäjän kanšojen yhtevyön vuuvvella ta karjalaisen runoilijan Vladimir Brendojevin 95-vuotisjuhlalla, kertou Karjalan tašavallan kanšallisen ta alovehellisen politiikan ministerijö.

— Perintehen mukah aktijoh liitytäh Karjalan tašavalta šekä Tverin, Leningradin ta Vologdan alovehet. Šaneluo voipi kirjuttua yli 70 tilašša šekä online-muuvvošša, ministerijö tiijottau poštaukšeššah Vkontaktešša.

Vuotena 2026 karjalankielisen šanelun ošallistujat ruvetah kirjuttamah Vladimir Brendojevin tekstie.

— Teksti on Vladimir Brendojevin kirjuttamat esišanat kertomukšien kokomukšeh. Še kertou, kuin kakši perehtä eläy šamašša pirtissä. Näin hyö šiäššetäh lämpyö ta viluššettah toista pirttie, jotta piäššä parasiittiloista. Konša perehet levätäh, vanha ämmö kertou heilä eri juttuja elämäštä. Teksti on livvin murtehella, a mie kiännän šitä vienankarjalan murtehella. Työ on vaikie ta mukava. Vladimir Brendojevilla on omaluatuni tyyli ta hieno kirjuttamistapa. Pitäy šuaha neuvuo kielen tietäjiltä, kertou Oma Medialla Oma Mua-lehen toimittaja Uljana Tikkanen.

Šanelu karjalan ta vepšän kielellä -aktijuo järješšetäh Karjalan tašavallan kanšallisen ta alovehellisen politiikan ministerijön kannatukšella.

Aihiešta voit lukie niise šuomekši, vepšäkši ta venäjäkši.

Yhty Oman Median Telegram-kanalah!