Karjalašša nellä keškiaštien ammattikoulutukšen laitošta meinuau liittyö Professionalitet-projektih
Karjalašša nellä keškiaštien ammattikoulutukšen laitošta, kumpasien luvušša on johtajie kolledžija ta tehnikumija, meinatah ošallistuo kilpailuh ta luatie klasterija federalisen Professionalitet-projektin rajoissa. Še antau opaššušlaitokšilla šuaha nykyaikasie laittehie. Šiitä kertou TASS-uutistoimisto viitaten Karjalan opaššuš- ta urheiluministerijöh.
Kilpailuh šuunnitellah ošallistuo Petroskoin meččätenkillini tehnikumi, Petroskoin pedagogini kolledži, Sortavalan kolledži ta Petroskoin liäketiijollini peruškolledži.
— Kilpailun ošallistujat šuunnitellah luatie pedagogini, meččätevollini ta meččäteknillini klasteri šekä klasteri šuojelu- ta kliinisen liäketiijon alalla, TASS tiijottau. — Täh aikah Professionlitet-projektin rajoissa Karjalan keškiaštien ammattikoulutukšešša toimiu nellä klasterie. Ne erikoissutah turismih ta palvelušalah, mineralitevollisuoh ta konehenrakennukšeh.
Projektin rajoissa laitokšissa on järješšetty opaššuš- ta tuontanto-ošaštoja, missä opaštujat kehitetäh omie taitoja. Lisäkši on peruššettu kolme opaššuš- ta tuontantokompleksie. Ne annetah opaštujilla ta piäštökkähillä mahollisuš valmistautuo käyttännöllisešti ta šuaha väliaikani ruato.
Federalini Professionalitet-projekti pantih käyntih vuotena 2022.
Yhty Oman Median Telegram-kanalah!
