Karjal piäroulis: festivuali rodieu omistettu Brendojevan vuozipäiväle
Karjalan Rahvahan Liitto valmistau teatrujoukkoloin Karjal piäroulis -festivuali-kilbua, kudai rodieu omistettu karjalazen runoilijan Vladimir Brendojevan 95-vuozipäviäle. On allettu alovehienvälizen kilvan enzimäine vaihe, vastah otetah teatrujoukkoloin zajavkoi.
— Karjalan Rahvahan Liitto enzimästy kerdua valmistau mostu ruavahien teatrujoukkoloin kilbua. Ga liitol on kogemustu, myöhäi piemmö kerran kahtes vuvves lapsile tarkoitettuu Karjalaine suarnu -festivualii. Sendäh hyvä, ku ruavahilgi rodieu mahto ozuttua omii teatruneroloi. Tahtommo, ku meijän projektan avul elavuttas endizet da roittas uvvet teatrujoukot, hyvä, ku net käytettäs omis ozutelmois karjalankieldy da folklourua, ozutettas karjalazien perindölöi, sanoi Oma Mediale Anna Jakovleva, Karjalan Rahvahan Liiton piälikkö.
Kilbah kučutah Karjalan da Ven’an toizien alovehien nuorižon da ruavahien teatrujoukkoloi. Kilbuniekoin igä on 18 vuottu vahnembat. Festivualih ezitettäväkse otetah ozutelmii karjalan kielel ei enämbiä puoldutostu čuassuu pitkii.
Zajavkoi otetah vastah sähköpoštah merkil ”Karjal piäroulis” kevätkuun 25. päiväh suate.
Festivualin toizeh vaihieh vallittuloi luvettelun miäriäy arvostusjoukko. Virrallizet kučut teatrujoukkoloile työtäh 1.—5. sulakuudu. Festivualin toine vaihe pietäh 17.—18. sulakuudu 2026 Vladimir Brendojevan roindumual, Anuksen linnas.
Karjalan Rahvahan Liitto valmistau piduo Karjalan perindöt teatrulaval -projektan mugah Karjalan tazavallan piämiehen grantufondan kannatuksel.
Ližiä tieduo kilbah nähte täs.
Aihies voit lugie suomeksegi.
Yhty Oman Median kanualah Telegramas!
