”Karjal pajattau”: pajopruazniekku lähestyy
Kezäkuun 27.—28. päivänny Petroskois uvvessah pietäh Karjal pajattau -pruazniekku. Tänä vuon projektu ”Kanzoinväline pajopruazniekku ”Karjal pajattau” voitti Ven’an kul’tuurufondan grantoin kilvas da sai den’gutugie.
Pajopruazniekkah tulou 74 pajojoukkuo, enämbi 1500 pajattajua Ven’an kymmenes alovehes Piiteris Omskah suate, Čuupan kyläs Pskovan linnassah.
Tämän vuvven pajopazniekas kai pajot pajatetah yhtehizil pajojoukkoloil, kudamii rubieu johtamah 12 dirižorua da piälimäzenny rodieu Anatolii Tsep, Ven’an valdivollizen Polenovan nimellizen Rahvahan taijon koin ozaston piälikkö.
— Joga kerdua opimmo keksie midägi uuttu. Täl keruda pruazniekas rodieu viizi suurdu ozua. Enzimäi akadeemizet da kanzallizet horat ruvetah pajattamah pajoloi omanmuan suvaičukses, Voitonpäivän kunnivokse, nevvostoliitoanaigazien säveldäjien tevoksii. Sit ruvetah pajattamah lapset, heijän peräh suuret akadeemizet horat, sit kanzallizet pajojoukot da jälgimäi kaikin yhtes tuttuloi pajoloi, sanoi Oma Mediale Tatjana Ledn’eva, Kanzallizen taijon da kul’tuurualguhpanoloin keskuksen varapiälikkö.
Kanzoinvälisty festivualii pietäh kahten merkipäivän kunnivokse: Karjalan tazavaldu täyttäy 105 vuottu da Ven’an valdivollizen Polenovan nimellizen Rahvahan taijon kodi täyttäy 110 vuottu.
Aihies voit lugie vepsäkse, suomekse da ven'aksegi.
