KareliaSkiFest: Ken hiihti loppuh še jo on voittaja
Karjalan šuurin talviurheilulajien festivali loppu 18. kevätkuuta Petroskoissa. Šen viimesenä päivänä oli pietty klassisen tyylin hiihtomarafoni.
Yli kakšišatua eri-ikäistä urheilijua tuli kilpailomah talvifestivalin viimeisen päivän marafonissa ta hiihtoajoissa. 127 marafonilaista hiihti loppuh klassisessa 50-kilometrisešša marafonissa. Onnittelomah hiihtäjie tuli hiihtoajojen muailman hopie muasteri, Turinin olimpijakisojen ošallistuja Nikolai Pankratov.
— Klassisen tyylin marafoni on šemmoni kilpailu, kumpasešša pitäy ajatella, ajuako še vain kiällä tunkeutumalla, šukšivoijetta käyttämättä, tahi perintehellisešti käyttyä šitä. Karjalašša ei ole korkeita ta jyrkkie noušuja, šentäh voipi ajua ilman voijetta. Šuat hyvän tuloš, još valmissat iččie ta olet rauhallini ennein kilpailuja, šano urheilija Nikolai Pankratov.
— Hiihtomarafonien lisäkši ohjelmašša oli polkupyörä- ta koiraval’l’akkoajot. Še oli šuuri tapahtuma, kumpani kešti yli netälie. Voin šanuo, jotta jokahini, ken hiihti tahi ajo loppuh on festivalin voittaja, šano festivalin järještäjä Aleksei Durjagin.
Klassisešša hiihtomarafonissa nopeimpana oli Jevgenii Tsepkov Pereslavl’-Zalesskii -kaupunkista, hiän hiihti 50 kilometrie kahešša tunnissa kymmeneššä minuutissa. Naisien kešen voitti Inna Simakova Moskovašta. Urheilijalla še oli enšimmäini klassini marafoni 50 kilometrilla.
KareliaSkiFest yhisti muutoma tuhat ošallistujua, še on Venäjän yksi šuuremmista talviurheilufestivaliloista. Tapahtuman marafonit kuulutah RussiaLoppet-marafonišarjah.
