Karel’skaja kuhn’a: čöke on pandu
Petroskois 8. syvyskuudu ezitettih Karjalan eläjien kanzoin perindöllizien syömizien kogomus. Prezentatsii nareko piettih sinä piän, ku se on uuzi pruazniekku Ven’al. Täs vuvves algajen sinä piän ruvetah pidämäh Ven’an kanzoin kielien päiviä.
Pivos ezitetty kogomus on suuren projektan tulos da lopputuoteh.
Karel’skaja kuhn’a i točka -projektu oli pandu pattahile Petroskois syvyskuul vuvvennu 2025. Sih kučuttih kandukanzoin edustajii, kuduat hyvin tietäh perindöllizii syömizii da maltetah niilöi valmistua, restoruanois ruadajii keittäjii, karjalazien, vepsäläzien da Karjalas eläjien ven’alazien rahvasjoukkoloin perindölöi da taboi tutkijoi. Projektan todevuttamizen aigah projektan rahvas käydih matkoih pitkin Karjalua keriämäh ainehistuo: syömizien retseptoi, fotokuvii, paginoi da kerdomuksii. Hyö käydih Jyškyjärvele da Vuokkiniemeh, Virmah, N’uhčah da Sumskii posad-kyläh, Kinnermäle, Alavozeh da Anukseh.
— Projektan aigah ajelimmo Karjalan kymmen piirin kylih. Jogahine vastavus jäi mustoh, kui hyvin meidy otettih vastah, ozutettih syömizien varustamistu, ennevahnazii vehkehii da ruadobrujii, kudamis ruokos on joga perehes, sanoi kirjan prezentatsies projektan piälikkö Anna Anhimova.
Projektan looputuloksennu olijah syömizien kogomukseh kuulutah karjalazien, vepsäläzien da ven’alazien perindöllizien syömizien ennevahnazet da nygyaigazembat retseptat. Kirjah, kuduas on 160 sivuu, on painettu 50 ainavoluadustu retseptua. Kai tekstat on kiännetty karjalakse da vepsäkse. Kiändäjinny oldih Oman Muan da Kodima-lehten toimittajat.
Fotokuvat kirjah niškoi luadi Ilja Timin. Kirjua on painettu 500 palua. Erähät juattih kirjan prezentatsies, dostalit työtäh Karjalah piirilöih.
Aihies voit lugie sežo vepsäkse.
Yhty Oman Median kanualah MAX:as!
