Kanzallizes muzeis luajitah siirrettävy ozuttelu karjalan kielel
Karjalan kanzallizen muzein karjalan kielen käyttöh suunnattu projektu piäzi voittajien joukkoh Ven’an pohjaispuolen muzeit -grantukilvas.
Kilbah oli työtty Karjalan kielen muzeikirjaimikko -projektu, kuduan valmisti muzein tiedoruadai Sofja Nikitina.
— Projektu algavuu keväkuus da loppehes kylmykuus 2026. Myö tavoitammo kävvä Vieljärven Karjalan kielen kodih, Kalevalah. Myö tahtozimmo ozuttua, ku karjalan kieli kehittyy, se ei ole kiini vaigu mennytaigazes histouries da ennevahnazis vehkehis. Sendäh projektan aigah rubiemmo ruadamah kielellistygi ruaduo, sanoi Oma Mediale Sofja Nikitina.
Sotsiokul’tuurizen Karjalan kielen muzeikirjaimikko -projektan mugah ruvetah luadimah erinomazii muzein metoudiekkoi moizien muzeih käyjien kannattamizekse, kuduat tavoitetah paista karjalakse da opastuo omah kieleh.
Projektan hantuzis luajitah opaskirju ”Karjalan kielen muzeikirjamikko” Karjalan kanzallizen muzein alallizien ozutuksien perustal, sego valmistetah samannimine siirrettävy ozuttelu da programmu muzeih tulijoih niškoi.
Siirrettävy ozuttelu työtäh Kalevalan da Anuksen kanzallizih piirilöih, kudamis perindöllizesti eläy enin vuitti karjalastu.
Yhty Oman Median kanualah Telegramas!
