Kanzallizen Ven’a-keskuksen ozasto avatah Karjalah
Kanzallizen Ven’a-keskuksen uvvet tilat luajitah Ven’an seiččemeh subjektah. Moizen käskyn andoi Ven’an prezidentu Vladmir Putin. Vuvvennu 2026 enzimäzii kaččojii otetah vastah R’azanin alovehel da Sevastopol’as. Keskuksen ozastolois paikallizile eläjile da tulolazile ruvetah kerdomah alovehien ruadotuloksis da potensiualas.
Kanzallizes Ven’a-keskukses omii projektoi ezitettih Kabardino-Balkarija, Karjal, Saha (Jakutija), Jaroslavl’an, Kirovan, Kaliningruadan, Nižnii Novgorodan alovehet da Habarovskan kolku. Kanzallizen Ven’a-keskuksen ozastot luajitah sinne eri aigah.
Ven’a-keskuksen piälikkö Natalja Virtuozova kerdoi Vladimir Putinale Moskovas avattavas keskuksen ozastos, Ven’al tuliel aigua avattavis ozastolois da kiändyi prezidentah puoleh:
— Työ avaitto enzimäzen moizen ozaston Vladivostokas 7. syvyskuudu 2025, sen jälles avavuttih ozastot Jenisein rannale Krasnojarskah da Irtiš-joven rannoile Hanti-Mansiiskah. Tänä vuon 12. kezäkuudu myö avuammo ozaston R’azanih da 1. syvyskuudu Sevaspol’ah, kerdou Natalja Virtuozovan sanoi Karjalan haldivon virralline saitu.
Prezidentu Putin andoi käskyn avata Ven’a-keskuksen ozastot Ven’an subjektoih sen jälles, konzu hyvin oli pietty Ven’a-ozuttelu, kuduas muan subjektat ozutettih omii tärgielöi suavutuksii.
Aihies voit lugie suomeksegi.
Yhty Oman Median kanualah MAX:as!
