Kantelen kodiš mäni vepsläižele kul’turale omištadud konferencii
Kantelen kodiš mäni vepsläižele kul’turale omištadud konferencii “Vepsläižed satrinad”. Sen pätegendan om vepsläižen kul’turan popul’arizoitand noriden mehiden keskes.
Konferencii pidetihe ühtennimižen projektan aigan. Projektad tegeb “Kul’turan kehitoitandan liga” Karjalan pämehen grantoiden fondan rahatugel.
Dokladoidenke “Vepsläižed starinad” -konferencijal eziniba Karjalan Tedokeskusen radnikad — tedomehed, kudambad oppiba vepsläižid tradicijoid, veroid da fol’klorad, mugažo ičeze tedoil da mahtištol jagoihe Karjalan Rahvahaližen teatran artist Aleksandra Aniskina da “Kantele” -ansambl’an artistad, kudambad äi vot kaičeba da popul’arizoitaba vepsän kul’turad ičeze rados.
— Olen mugošt mel’t, miše Venäman rahvahiden ühtmuden vodel om lujas tärged vahvištoitta sidod sugupol’viden keskes, om tärged sirtta norile sugupol’vile tedoid, miččed om kaitud nügüdehesai, starinoiči projektan pätegii Aleksandra Aniskina.
“Vepsläižed starinad” -konferencii sünduti melentartušt norištol. Nored mehed tegiba äi küzundoid ezinijoile. Mugažo konferencijan aigan ühtnikoiden täht “Kantele” -ansambl’ tegi kargun mastar’-klassan.
Tarkištele "Oma Median" MAX-kanalad!
