Kantele da virsikannel: Karjalaha tuli muzikaline ekspedicii Viborgaspäi
Petroskoihe tuli muzikaline ekspedicii Viborgaspäi. Sen ühtnikad tegiba ”Kantele da virsikannel’”- koncertan Petroskoin lüterilaižes prihodas.
Ekspedicijan ühtnikad — muzikantad Viborgaspäi, Piterišpäi, Petroskoišpäi, Rževaspäi — tegeba koume koncartad Karjalas. Ezmäine jo mäni tämbei Karjalan pälidnas.
— Mö ajam oppimaha Vauktan meren Karjalan lüterilaižiden muzikaližid tradicijoid. Nece koncert mäneb ”Kantele da virsikannel’”- hengeližen muzikan ezmäižen kezafestivalin aigan, sanui projektan koordinator Darja Škurl’atjeva.
Muzikantad otiba kerdale äi erazvuiččid rahvahaližid vändimid: seičeme kanteled, kaks’ jouhikkod, kaks’ blokfleitad, virsikannelen, kelloižid, viola da gamban, kel’toiden arfan. Virsikanneled kävutoittihe äjan Karjalan da Piterin aigan lüterilaižiš prihodoiš XIX-voz’sadan toižes poles, konz oli lujas kalliž ostta organad. Virsikannel’ satoi hristialaižid gimnoid služban aigan. Muloi Viborgan prihodas udessündutadihe nece tradicii.
Nelläs päiväs ekspedicijan ühtnikad ajaba enamba 2000 kilometrad. Petroskoišpäi hö lähteba Kemihe da Kalevalaha. Programmas oma XVI—XX-voz’sadan hengeližid pajoid, runoid, vanh muzik organan i viola da gamban täht i äi tošt. Koncertan jäl’ghe kundlijoil om voimuz iče väta kantelel da virsikannelel.
