Kešäkuun lopušša Jakutskissa piettih Venäjän kanšallisien teatterien enšimmäini kongressi. Še oli enšimmäini kokouš Kanšallisien teatterien liiton peruštamisen jälkeh. Kongressissa Karjalan tašavaltua etuššettih kulttuuriministeri Aleksei Lesonen ta Kanšallisen teatterin johtaja Irina Šumskaja. Kaikkieštah toimenpitoh tuli yli 50 ihmistä Venäjän eri paikoista.
— Kongressissa paistih kulttuuri-identiteetin šäilyttämiseštä, paikallisien yhteiskuntien yhistämiseštä kanšallisien teatterien kautti, teatterialan opaššušohjelmien ta šivissyšprojektien kehittämiseštä, šanotat Karjalan kulttuuriministerijön etuštajat.
Šamanaikasešti Jakutskissa toimi kešäni teatterikoulu, kumpasen niise järješti Kanšallisien teatterien liitto. Jakutskin teatterikoulušša nuoret ohjuajat esitettih omien spektaklien projektija, kumpaset oli luajittu koulun ruavon aikana. Kešän aikana pietäh vielä šeiččemen tämmöistä kouluo.
Kongressi oli pietty Saha-tašavallan 100-vuotispäivän juhlimisen rajoissa. Juhlavuuvven rajoissa piettih ni Aleksanterin teatterin vierailumatka.
Kanšallisien teatterien liiton toiminnan enši aškelena on taitokoulun pitämini Tavrida-taitofestivalissa.