Kalevala. Jutut -VR-spektaklie näytetäh tuiskukuun lopušša ta kevätkuun alušša Karjalan kanšallisešša teatterissa. Spektakli on Kultani nuamio 2020 -teatterikilpailun nominanti. VR-spektakli on Kanšallisen teatterin ta Helsinkin Theater & VR InterLab ry -yhtijön yhteisruato. Še upottau kaččojua Kalevala-eepossan ilmapiirih. Spektaklin luatimisešša käytettih nykyaikasie teknologijoita. Šiinä männyt aika vaštautuu nykyiseh. Spektaklie esitetäh 27.– 8. tuiskukuuta šekä 1.–2. kevätkuuta.
Šamoin Kalevalan päivänä, 28. tuiskukuuta Kanšallisešša teatterissa pietäh luatijan oppimatkua kulissien tuakše. Kanšallisen teatterin šaloista ta näyttelijän ammatista kertou näyttelijä Andrei Gorškov.
– Vierahat nähäh ta tiijuššetah šitä, mistä jokahini spektaklien kaččoja ei tiijä. Oppimatan ošallistujilla niise ehotetah tarkistua omie tietoja karjalaisista pukuloista ta opaštuo karjalaisie šanoja, kerrotah Kanšallisen teatterin VK-šivulla.
Kalevalan päivyä pietäh 28. tuiskukuuta, juuri šiinä päivänä Elias Lönnrot lopetti “Kalevalan” enšimmäisen painokšen käsikirjutušta.