Kallivopiirustuksien löydäjäle luajitah mustopačas
Karjalan piämies Artur Parfenčikov da Sankt-Peterburgan yliopiston rektoru Nikolai Kropačov šeikuittih Valgienmeren kallivopiirustuksien löydämizen 100-vuozipäiväle omistettuloin pidoloin programmua.
— Sankt-Peterburgan yliopisto on meijän piälimäine da aktiivizin pidoloih yhtyi. Juuri tämänhäi yliopiston aspirantu, tulii arheolougu da kirjuttai Aleksandr Linevskii löydi Valgien meren kallivopiirustukset, konzu vuvvennu 1926 tuli Karjalah etnogruafizele praktiekale. Meijän yhtehizii pluanoi Sankt-Peterburgan yliopiston kel on Linevskoin mustopaččahan azettamine Belomorskah. Sidä kyzymysty yliopistos mietitäh ylen vagavah: ilmoitetah kogo Ven’an kilbu mustopaččahan luonnoksen luadimizeh da valmistamizeh, sanoi Parfenčikov omassah lehtistöpalvelule.
Paiči sidä Sankt-Peterburgan yliopiston dizainan laboratourien spetsialistat autetah luadie Valgien meren talismuanoin dizainu 2D- da 3D-muodolois. Talismuanas rodieu Ljok — Linevskoin tundietun Kivikirjan sivut -kerdomuksen urhoi. Ielleh kačotah piästiä ilmoih mustolahjua, T-paidua da elostustu Ljon-urhoin kel.
Yhtes Sankt-Peterburgan yliopiston kel sygyzyl pietäh tiedo-praktielline konferensii. Se valmistetah mennyt vuon avatun Zalavruga-vizitkeskuksen tilois. Sie on hoteli 40 hengele, koufeilu 150 hengele, ozutus- da konferensiizualat. Uuzi keskus on korgiesti arvostettu — mennyt vuon JUNESKO:n luvetteluh kuulujale objektale kävyi kahteh kerdah enämbi turistua, migu enne.
Aihies voit lugie suomeksegi.
Yhty Oman Median kanualah MAX:as!
